Drejtoria Rajonale e Policisë në Gjakoveë ka bërë të ditur se pas një pune intensive sot me datën 19.01.2018 në ora 11:50 ekipi i FSK-së arriti të nxjerrë nga uji trupin e pajetë të personit të viktimës M. H., kosovar/ shqiptar i moshës 82 vjeçar nga Gjakova, trupi i të ndjerit është gjetur përafërsisht rreth dy kilometra nga vendi i ngjarjes.

“Njësitet e FSK-së nuk pushuan së kërkuari në asnjë moment për 14 ditë rresht , të përkrahur kohë pas kohe edhe nga njësiti i zhytësve nga Mitrovica dhe ekipi i zjarrfikësve nga Gjakova edhe përkundër terrenit të pa përshtatshëm dhe vështirësive tjera”, thuhet në njoftim, transmeton Arbresh.info.

Me datën 5 janar 2018 në orën 16:35 stacioni policor në Gjakovë ka marrë informatë nga një ankues lidhur me zhdukjen e prindit të tij.

Më pas Policia është informuar nga një dëshmitar se personi në fjalë kishte kërcyer nga ura që lidhë pjesën e qytetit me fshatin Moglicë dhe ishte hedhur në lumin Erenik, informatë kjo të cilën e kemi vërtetuar edhe përmes kamerave të sigurisë që janë të vendosura në qytet.

Policia ka dalë në vendin e ngjarjes dhe ka njoftuar të gjitha njësitet relevante lidhur me rastin.

Në vendin e ngjarjes janë përgjigjur shumë shpejtë ekipet për kërkim-shpëtim nga FSK-ja, si dhe ekipi i zjarrfikësve nga Gjakova./Arbresh.info